Қувваҳои мусаллаҳи мамлакат муҳимтарин мактаби мардонагӣ мебошанд

ДУШАНБЕ, 23.02.2017 /АМИТ «Ховар»/. Барои насли наврас хизмат дар сафи Қувваҳои мусаллаҳи мамлакат муҳимтарин мактаби мардонагӣ мебошад. Ин нуктаро имрӯз Тоҳир Каримзода, сардори Хадамоти муҳоҷирати Вазорати меҳнат, муҳоҷират ва шуғли аҳолии Ҷумҳурии дар ҷамъомади тантанавӣ ба муносибати 24-солагии таъсиси Артиши миллии Ҷумҳурии Тоҷикистон иброз дошт. Дар ин бора аз Хадамоти муҳоҷират иттилоъ доданд.
Т. Каримзода зикр намуд, ки ҳар кишвар дорои артиши худ аст, вале Артиши миллии Тоҷикистон замоне таъсис дода шуд, ки вазъи сиёсию иқтисодӣ ва иҷтимоии кишвар дар ҳолати ноором қарор дошт ва низомиёни касбӣ дар кишвар кам буданд. Имрӯзҳо маҳз бо шарофати кӯшишу заҳматҳои Сарфармондеҳи Олии Қувваҳои Мусаллаҳи кишвар Эмомалӣ Раҳмон Артиши миллии Тоҷикистон дар ҳоли рушду тараққиёт қарор дошта, хеле пурқувват гардидааст.
«Вақте ки мо ватандӯстӣ мегӯем, пеш аз ҳама, муҳофизати Ватан ва якпорчагии марзу буми кишварро дар назар дорем. Вазифаи ҳар як шаҳрванди ватандӯст афзун намудани дастовардҳои Истиқлолият ва таҳкими рукнҳои давлатдорӣ, аз ҷумла Қувваҳои мусаллаҳи кишвар мебошад»,- иброз дошт сардори Хадамот.
Дар маҷлиси тантанавӣ Абдураҳмон Хонов, роҳбари Дастгоҳи Кумитаи иҷроияи марказии Ҳизби Халқии Демократии Тоҷикистон, Муҳаббат Иброҳимзода, директори Муассисаи давлатии «Маркази миллии Тоҷикистон оид ба масъалаҳои минаҳо» ва дигарон иштирок намуданд.