Вохӯрии Эмин Сангинзода бо коршиносони Созмони Байналмилалии Меҳнат

ДУШАНБЕ, 23.02.2017. /АМИТ «Ховар»/. Имрӯз, 23 феврал дар Вазорати меҳнат, муҳоҷират ва шуғли аҳолии Ҷумҳурии Тоҷикистон мулоқоти муовини якуми вазир Эмин Сангинзода бо коршиносони Ташкилоти Байналмилалии Меҳнат (ТБМ) Николай Стюдер, сармутахассиси Бюрои ТБМ оид ба музди меҳнат дар шаҳри Москва ва Патрик Белсер, роҳбари шуъба оид ба масъалаҳои музди меҳнати Бюрои ТБМ дар Женева доир гардид.
Тавре ки аз вазорати мазкур ба АМИТ «Ховар» хабар доданд, зимни мулоқот ҷонибҳо масъалаҳои марбут ба ҷараёни татбиқи «Барномаи ҳамкорӣ байни шарикони сетарафаи Ҷумҳурии Тоҷикистон ва Ташкилоти Байналмилалии Меҳнат оид ба меҳнати арзанда барои солҳои 2015-2017»-ро баррасӣ намуданд. Коршиносони ТБМ тасмим гирифтанд, ки дар гузаронидани корҳои илмӣ-тадқиқотӣ оид ба масъалаҳои меъёрбандӣ ва музди меҳнат бо истифодаи таҷрибаи байналмилалӣ ба ҷараёни ташаккули сиёсат дар соҳаи мазкур ба шарикони иҷтимоӣ мусоидат намоянд.
Ҳамзамон вохӯрии коршиносони даъватшуда бо шарикони иҷтимоӣ, роҳбарони Муассисаи давлатии «Пажӯҳишгоҳи меҳнат, муҳоҷират ва шуғли аҳолӣ» ва Хадамоти назорати давлатии соҳаи меҳнат, муҳоҷират ва шуғли аҳолии вазорат дар назар аст.
Дар ин робита дар доираи Барномаи ҳамкорӣ байни шарикони сетарафаи Ҷумҳурии Тоҷикистон ва Ташкилоти Байналмилалии Меҳнат оид ба меҳнати арзанда барои солҳои 2015-2017 ҷиҳати тақвият бахшидан ва баланд бардоштани неруи шарикони сетарафа оид ба ислоҳоти сиёсат ва низоми музди меҳнат тавассути муколамаи иҷтимоӣ ва оид ба баррасии натиҷаҳои татбиқи Косепсияи ислоҳоти музди меҳнат дар Ҷумҳурии Тоҷикистон ва шарҳи маърўзаи ҳаматарафаи Ташкилоти Байналмилалии Меҳнат «Музди меҳнат дар мамлакатҳои олам дар солҳои 2016 2017» 24 феврали соли 2017 бо иштироки вазорату идораҳо ва шарикони иҷтимоӣ ҷамъомад пешбинӣ гардидааст.