Қадрдонии сарнишинони ҳавопаймои «Boeing 737 300» бо 10 ҳазор сомонӣ аз ҷониби роҳбарияти Фурудгоҳи байналмиллалии Хуҷанд

ХУҶАНД. 31.03.2017. /АМИТ «Ховар»/. Роҳбарияти Фурудгоҳи байналмилалии Хуҷанд ба кори сардори ҳайати сарнишинони ҳавопаймои «Boeing 737 300», мансуб ба ширкати миллии ҳавонавардии Тоҷикистон «Тоҷик-Эйр» — Абдурашид Ясинов, ҳавонаварди дуюм Раҳматҷон Холматов ва дигар халабонҳои ҳавопаймо барои шуҷоатмандию корнамоӣ зимни иҷрои вазифа ва маҳорати касбиашон дар таъмини амнияти мусофирон баҳои баланд дода, дирӯз зимни баргузории маҷлиси тантанавӣ хизмати онҳоро бо даҳ ҳазор сомонӣ, сипоснома ва туҳфаҳои хотиравӣ қадрдонӣ намуд. Дар ин бора ба АМИТ Ховар масъулин аз хадамоти матбуотии «Фурудгоҳи байналмилалии Хуҷанд» иттилоъ доданд.
Бояд гуфт, ки шаби 9 март ҳавопаймои «Boeing 737 300», ки дар хатсайри Хуҷанд-Москва бо 140 нафар мусофир ва 9 нафар ҳайати сарнишинон парвоз менамуд, баъди пур кардани сӯзишворӣ дар Фурудгоҳи байналмилалии Тараз /Қазоқистон/ парвозро ба самти Москва идома дод, вале бо сабаби пайдо шудани нуқси техникӣ дар чархи рости ҳавопаймо соати 21:00 аз фурудгоҳи Тараз ба самти Хуҷанд парвоз намуда, баъди 3 соату 40 дақиқа бо холӣ кардани сӯзишвории ҳавопаймо дар фазо дар ҳолати изтирорӣ дар Фурудгоҳи байналмилалии Хуҷанд фуруд омад.