Ҷамбасти озмуни «Кадбонуи беҳтарин» дар «Боғи Ирам»-и пойтахт

ДУШАНБЕ, 22.03.2017. /АМИТ «Ховар»/. Тибқи дастури Роҳбари дастгоҳи иҷроияи Президенти Ҷумҳурии Тоҷикистон ва ибтикори Кумитаи кор бо занон ва оилаи назди Ҳукумати Ҷумҳурии Тоҷикистон бо мақсади тарғибу ташвиқи фарҳангу арзишҳои миллӣ, эҳёи ҳунарҳои мардумӣ, эҳтиром ба хўрокҳои миллӣ, аврупоӣ ва меҳнати истеҳсолкунандаи молу маҳсулот дар муассисаи давлатии «Боғи Ирам»-и пойтахт озмуни ҷумҳуриявии «Кадбонуи беҳтарин» баргузор гардид. Дар ин бора аз Кумитаи кор бо занон ва оилаи назди Ҳукумати Ҷумҳурии Тоҷикистон хабар доданд.
Кадбонуҳои бехтарин аз тамоми минтақаҳои ҷумҳурӣ ширкат варзида, аз рўи шартҳои таомҳои миллӣ ва хўришҳои гуногунро  ба маърази тамошо гузоштанд. Аъзоёни ҳакамон ба ҳунари волои кадбонуи  босалиқа баҳои баланд дода, ҷойи якум насиби ноҳияи Ҷалоллидини Балхӣ, ҷойи  дувум насиби ноҳияи Варзоб ва ҷойҳои сеюму чорум насиби шаҳри Душанбе ва ноҳияи Рўдакӣ гардида, ғолибон бо Сипосномаву ифтихорнома ва мукофотҳои пулӣ  қадрдонӣ гардиданд.
Тавре баргузоркунандагони ини чорабинӣ хабар доданд, мақсад аз баргузории намоиши мазкур муаррифӣ ва эҳёи  навъҳои гуногуни хўрокҳои миллӣ мебошад.