Азим Иброҳим бо Мазен Шамия рушди имкониятҳои ҳамкорӣ дар самтҳои гуногуни иқтисодиро баррасӣ намуданд

ДУШАНБЕ, 30.03.2017. /АМИТ «Ховар»/. Дирӯз муовини Сарвазири Ҷумҳурии Тоҷикистон Азим Иброҳим бо муовини Вазири корҳои хориҷии Фаластин Мазен Шамия мулоқот кард.
Дар мулоқот ҷонибҳо рушди имкониятҳои ҳамкориро дар самтҳои гуногуни иқтисодӣ баррасӣ намуда, аз ҷумла соҳаҳои кишоварзӣ ва сайёҳиро мутақобилан судманд арзёбӣ намуданд.
Ҷониби Фаластин изҳор намуд, ки онҳо тасмим гирифтаанд Рўзҳои фарҳангии кишварашонро дар Ҷумҳурии Тоҷикистон баргузор намоянд. Ҷониби Тоҷикистон қайд намуд, ки ин пешниҳод тибқи тартиби муқарраргардида матраҳ хоҳад гардид.
Ҳарду ҷониб таъкид намуданд, ки баргузории чунин вохӯрӣ ва муколамаҳо заминаи воқеиро барои рушди ҳамкории минбаъда фароҳам меоварад.