Дар Академияи илмҳо конфронси «Наврӯз ва ҷавонон» баргузор гардид

ДУШАНБЕ, 16.03.2017 /АМИТ «Ховар»/. Имрӯз, 16 март бо ибтикори Шӯрои олимони ҷавони Раёсати Академияи илмҳои Ҷумҳурии Тоҷикистон дар мавзӯи «Наврӯз ва ҷавонон» Конфронси илмӣ-амалӣ баргузор шуд. Дар конфронс олимони ҷавон аз муассисаҳои илмии мамлакат ширкат варзиданд.
Фарҳод Раҳимӣ, президенти Академияи илмҳои Ҷумҳурии Тоҷикистон бо таъкид аз саҳми олимони ҷавон дар таҳқиқи анъанаҳои наврӯзӣ дар Соли ҷавонон Наврӯзро ҷашни зебоӣ ва эҳёи табиат номид.
Ҳамчунин дар конфронси мазкур гуфта шуд, ки Наврӯз ғалабаи нур бар зулмот, пирӯзии некӣ бар бадӣ ва бартарии покӣ бар фасод аст.
«Дар манбаъҳои таърихӣ, аз қабили «Наврӯзнома», «Осор-ул-боқия», «Форснома», «Шоҳнома», «Таърихи Табарӣ» ва дигар осори гаронбаҳо таърихи ҷашни Наврӯзро таҳқиқ намудаанд ва бузургони каломи мавзун дар тӯли ҳазорсолаҳо баҳорияҳои наврӯзӣ эҷод кардаанд, вале сарчашмаи асосӣ дар мавриди пажӯҳишҳои наврӯзӣ Авастову дигар кутуби Маздаясно маҳсуб меёбанд»,- зикр гардид дар Конфронси «Наврӯз ва ҷавонон».