Дар Гимназияи №74-и Душанбе ҳафтаи забони русӣ гузаронида шуд

ДУШАНБЕ, 09.03.2017 /АМИТ «Ховар»/. Дар Гимназияи №74- и ноҳияи Фирдавсии шаҳри Душанбе ҳафтаи забони русӣ таҳти унвони «Учи и люби русский язык» гузаронида шуд.
Тавре ба хабарнигори АМИТ «Ховар» Манзура Файзуллоева, ҷонишини директор оид ба таълим ва тарбияи гимназияи мазкур хабар дод, дар доираи ҳафтаи забони русӣ озмунҳо барои навиштани иншои беҳтарин, диктанти беҳтарин, наттоқи беҳтарин ва тартиб додани лавҳаи девории беҳтарин эълон гардида буданд. Мавзӯъҳои озмун бахшида ба васфи Модар, Ватан, Наврӯз ва баҳор гузаронида шуд. Дар давоми ҳафта қариб аксарияти хонандагон аз синфи 3 то синфи 11 маҳорати хуб нишон дода, дар озмунҳо фаъолона иштирок намуданд.
Ба иттилои манбаъ, дар баробари озмунҳои иншои беҳтарин, хониши беҳтарин дар бораи асарҳои А.С.Пушкин, М.Ю.Лермонтов, А.Дониш, С.Айнӣ В. Шекспир, А.Дюма ва М.Твен маърӯзаҳо шунида шуд, ки ба баланд гаштани сатҳи забономӯзӣ, маърифат ва ҷаҳонбинии хонандагон мусоидат менамояд.
«Дар давоми ҳафтаи забони русӣ намоиши мултимедиавии китобҳо, муаррифиномаҳо ва машғулиятҳо тавассути таълими инноватсионӣ, намоишгоҳи адабиёти бачагона, луғатҳои электронӣ барои кӯдакон, бозиҳои компютерӣ барои омӯзиши забон, викторинаҳо, китобҳои дарсии электронӣ пешниҳод шуданд», — афзуд сарчашмаи хабар.
Гузаронидани ҳафтаи забони русӣ воситаест, ки муҳаббати хонандагонро ба омӯзиши забони русӣ зиёд карда, дар онҳо ҳисси кунҷковиро бедор мекунад ва мақсади асосии ҳафтаи забони русӣ низ инкишоф додани ҳавасмандии хонандагон нисбат ба омӯзиши забони русӣ арзёбӣ гардид.
Ҷамъбасти ҳафта дар маҷлисгоҳи Гимназия бо иштироки роҳбарият, омӯзгорон ва хонандагон гузаронида шуд. Дар чорабинӣ қироати шеър, саҳначаи таърихӣ ва бахши фарҳангӣ намоиш дода шуд. Дар фарҷом аз ҷониби роҳбарияти гимназия ғолибон бо мукофотҳо қадрдонӣ гардиданд.