Дар Конибодом бахшида ба Иди Наврӯз консерт ва сайругашти оммавӣ баргузор мешавад

ДУШАНБЕ, 17.03.2017. /АМИТ «Ховар»/. Бо мақсади дар сатҳи баланди маънавӣ, сиёсӣ ва фарҳангӣ баргузор намудани ҷашни байналмилалии Наврӯз, ки аз ҷашнҳои қадимаи халқи тоҷик аст, дар саросари шаҳри Конибодом корҳои омодагӣ бомаром ҷараён доранд. Тавре аз Мақомоти иҷроияи ҳокимияти давлатии ноҳия хабар доданд, сокинони шаҳр ҷашни фархундаи баҳору оғози эҳёи табиатро бо корҳои ободониву сарсабзгардонӣ пешвоз мегиранд.
Бахшида ба таҷлили Наврӯз ташкилу намоиши гулу паррандаҳои хушхон, анъанаҳои ниёгон, озмунҳои «Кадбонуи беҳтарин», «Арӯси замонавӣ», «Беҳтарин хони наврӯзӣ», баргузории тӯйҳои хайриявӣ, мусобиқаву озмунҳои мухталиф, аз қабили «Дави миллӣ», шоҳмотбозӣ, сангбардорӣ, гӯштини миллӣ, бандкашӣ ва ғайра ба нақша гирифта шудаанд.
«Ҳамчунин консертҳои идона ва сайругашти оммавӣ, намоиши филмҳо, инчунин консерти аҳли ҳунари Театри давлатии драмаи мусиқии шаҳр ва тантанаҳои наврӯзӣ пешниҳоди сокинон хоҳанд гашт»,-иттилоъ доданд аз Мақомоти ноҳия.