Дар ноҳияи Синои шаҳри Душанбе «Тантанаҳои ҷавонӣ» доир гардиданд

ДУШАНБЕ, 02.03.2017 /АМИТ «Ховар»/. 1 марти соли равон дар ноҳияи Синои шаҳри Душане дар доираи чорабиниҳои Бахши ҷавонон, варзиш ва сайёҳии ноҳияи Сино барномаи фарҳангиву фароғатӣ таҳти унвони «Тантанаҳои ҷавонӣ» баргузор карда шуд.
Барномаи фарҳангии «Тантанаҳои ҷавонӣ» ба Соли ҷавонон бахшида шуда, дар он наврасону ҷавонони боистеъдоди ноҳия ҳунарнамоӣ намуданд. Тавре аз бахши ҷавонон, варзиш ва сайёҳии ноҳияи Синои шаҳри Душанбе иттилоъ доданд, маҳфил бо мақсади баланд бардоштани ҳисси худшиносиву худогоҳии миллӣ ва боло бурдани маърифати фарҳангиву зебоипарастии насли наврас ва ҷавонон роҳандозӣ шудааст.
Бахши ҷавонон, варзиш ва сайёҳии ноҳияи Синои шаҳри Душанбе дар доираи барномаҳои худ бахшида ба Соли ҷавонон баргузории ҳамоишҳои гуногунсамтро ба нақша гирифтааст, ки онҳо аз 1 марти соли 2017 оғоз мегарданд.