Дар шаҳри Ваҳдат оид ба тақсими мероси волидайн аз нигоҳи қонун вохӯрӣ доир гардид

ВАҲДАТ, 02.03.2017. /АМИТ «Ховар»/. Имрӯзҳо тақсим намудани  мероси волидайн баъд аз марги онҳо яке аз масъалаҳои баҳсбарангезтарини рӯзгори сокинони ҷумҳурӣ гардидааст. Он дар аксари ҳолатҳо ба гусаста шудани робитаҳои хешутаборӣ, сар задани баҳсҳои тӯлонии додгоҳӣ ва ҳатто  хушунатҳои оилавӣ мепечад. Аз ин хотир кормандони идораи нотариалии давлатии шаҳри Ваҳдат дар маркази ҷамоати шаҳраки Нуъмон Розиқи  шаҳр дар мавзӯъҳои «Ба расмиятдарории васиятнома ва   тарзи навиштани он, тасдиқ, тағйир додан ва бекор кардани он», «Барасмиятдарории шаҳодатномаи ҳуқуқ ба мерос аз руйи қонун ва тартиби барасмиятдарории он»  бо   раисони маҳаллаҳо, фаъолон, ҷавонон ва падару модарон вохӯрӣ  доир намуданд. Дар ин бора Музаффаршо Хингов, нотариуси калони шаҳри Ваҳдат ба хабарнигори  АМИТ «Ховар» иттилоъ дод.

Инчунин дар вохӯрӣ дар бораи  дӯстиву рафоқати байниҳамдигарӣ, садоқату вафодорӣ, ғамхорӣ нисбат ба якдигар, масъулияти тарафайн дар ҳалли масъалаҳои оилавӣ, тарбия ва ба воя расонидани фарзандон дар рӯҳияи инсондӯстӣ ва дигар арзишҳои миллӣ суҳбат доир гардид.