Дар Тоҷикистон ҳуқуқҳои истеъмолкунандагон ҳимоя мешаванд

ДУШАНБЕ, 15.03.2017./ АМИТ «Ховар»/. Дар Маркази стандартизатсия, метрология, сертификатсия ва нозироти савдои вилояти Хатлон бахшида ба Рӯзи ҷаҳонии ҳифзи ҳуқуқи истеъмолкунандагон, ки ҳамасола 15 март таҷлил мегардад, ҳамоиш доир шуд.
Тавре ки аз Маркази «Тоҷикстандарт» дар вилояти Хатлон ба АМИТ «Ховар» хабар доданд, директори марказ Диловар Пирназарзода зикр намуд, ки ҷиҳати танзими муносибатҳо байни истеъмолкунандагон ва истеҳсолкунандагон, иҷрокунандагон ҳангоми фурӯши мол, кор, иҷрои кору хизматрасонӣ дар қаламрави Ҷумҳурии Тоҷикистон дар партави дастуру супоришҳои Пешвои миллат муҳтарам Эмомалӣ Раҳмон 15 майи соли 1997 Қонуни Ҷумҳурии Тоҷикистон «Дар бораи ҳимояи ҳуқуқи истеъмолкунандагон» қабул гардида, 9 декабри соли 2004 дар таҳрири нав мавриди амал қарор дода шуд. Қонуни мазкур ҳуқуқҳои истеъмолкунандагонро барои харидории мол, кор ва хизматрасониҳои дорои сифати номатлуб ва барои ҳаёту саломатии истемоълкунандагон бехатар, гирифтани маълумот оид ба мол, кору хизматрасониҳо ва истеҳсолкунандагону иҷрокунандагони он, ҳимояи давлатӣ ва ҷамъиятии манфиати онҳоро муқаррар ва тарзи татбиқи ин ҳуқуқҳоро муайян менамояд.
Марказ дар доираи ваколати хеш сиёсати давлатиро дар самти стандартизатсия, метрология, сертификатсия ва нозироти савдо дар вилояти Хатлон амалӣ намуда, мунтазам баҳри ҳимояи бозори истеъмолӣ аз молу маҳсулоти бесифату хатарнок, баланд бардоштани сифати молу маҳсулоти истеҳсоли ватанӣ, алалхусус дар самти молу маҳсулоти воридотивазкунанда ва ҳимояи ҳуқуқҳои истеъмолкунандагон чораҳои зарурӣ амалӣ менамояд.