Дар вилояти Хатлон корҳои соҳилмустаҳкамкунӣ вусъати тоза мегиранд

ДУШАНБЕ, 03.03.2017 /АМИТ «Ховар»/. Бо мақсади пешгирии хавфи офатҳои табиӣ ва мустаҳкам намудани соҳилҳои осебпазири дарёи Панҷи ҳудуди ноҳияи Мир Сайид Алии Ҳамадонӣ, бо кумаку дастгириҳои Ҳукумати Ҷумҳурии Тоҷикистон ва муассисаи давлатии Лоиҳаи идораи захираҳои оби водии Фарғона корҳои зиёди соҳилмустаҳкамкунӣ тавассути муассисаи сохтмонии ҶДММ «Зумруд» ба анҷом расонида шуданд.
Ба иттилои Мақомоти иҷроияи ҳокимияти давлатии вилояти Хатлон, дар назар аст, ки то баланд шудани сатҳи оби ин дарё ва оғоз гардидани борону селҳои мавсимӣ, мебояд ба андозаи 2600 адад тахтасангҳои сементӣ омода гардонида шаванд. Аз ин ҳисоб 600 донаи он танҳо барои мустаҳкам намудани садди иншооти обгардон пешбинӣ шудааст. Бо ин мақсад ба майдони сохтмон дар ҳаҷми 200 тонна семент ва 13 тонна арматура ворид гардида, пешбинӣ шудааст, ки рӯзҳои наздик маҳсулоти мазкур ба тахтасангҳои босифати соҳилмустаҳкамкунӣ мубаддал гардонида мешаванд.
Алҳол шумораи иншооти обгардони мавзеъ 22 ададро ташкил карда, дар ҳамаи онҳо корҳои барқароркунию навсозӣ идома доранд.