Дастрасии аҳолии маҳаллаи «Баҳористон»-и ноҳияи Бобоҷон Ғафуров ба оби тозаи нӯшокӣ

Б.Ғафуров, 04.03.2017. /АМИТ «Ховар»/. Соли 2017 дар вилояти Суғд мутобиқ ба иқдоми Раиси вилоят Абдураҳмон Қодирӣ «Соли дастрасии аҳолӣ ба оби тозаи нӯшокӣ» эълон гардидааст. Вобаста ба ин имрӯзҳо дар доираи барномаи вилоятӣ дар миқёси вилоят, аз ҷумла ноҳияи Бобоҷон Ғафуров  якчанд лоиҳаҳои судманд иҷро шуда истодаанд.

Чуноне ба хабарнигори АМИТ «Ховар» масъулин аз бахши кор бо маҳаллаҳои Мақомоти иҷроияи ҳокимияти давлатии ноҳияи мазкур иттилоъ доданд, соли равон дар доираи қабули Барномаи вилоятии «Дастрасии аҳолӣ ба оби тозаи нӯшокӣ» дар миқёси ноҳияи Бобоҷон Ғафуров баҳри боз ҳам беҳтар намудани таъминот бо оби тозаи нӯшокӣ дар як қатор маҳаллаву ҷамоатҳо якчанд чорабиниҳо ва лоиҳаҳо тарҳрезӣ гардида, алъон корҳо дар ин самт хуб ҷараён доранд.

Аз ҷумла, чанд муддат аст, ки дар маҳаллаи «Баҳористон»-и ҷамоати деҳоти Хистеварзи ноҳия дар доираи иҷрои Барномаи вилоятӣ бо мақсади дастрасии аҳолии ин маҳалла ба оби тозаи нӯшокӣ бо дастгирии Макомоти ичроияи хокимияти давлатии нохия ва маблағгузории ҳукумати Британияи Кабир, Фонди Оғохон ва ҳамчунин бо иштироки сокинони ин маҳалла, ки беш аз 7 ҳазор аҳолӣ дорад, корҳои кашидани хатти оби нӯшокӣ ба тариқи ҳашар идома доранд. Дар назар аст, ки дар муҳлатҳои наздик аҳолии ин маҳалла  бо оби тозаи нӯшокӣ таъмин шаванд.