«Душанбе-оинаи миллати соҳибтамаддуни тоҷик»: озмуни мақолаи беҳтарин

ДУШАНБЕ, 03.03.2017 /АМИТ «Ховар»/. Ба ифтихори Соли ҷавонон, 20-солагии Рӯзи Ваҳдати миллӣ ва дар ин замина баланд бардоштани маърифати сиёсиву фарҳангӣ, дӯстиву якдилӣ, муҳаббату ҳамбастагӣ, маданияти шаҳрнишинӣ, ифтихор аз сокини пойтахт будан, мусоидат ва тавсеа бахшидани эҳсоси худшиносӣ, садоқат ба Ватан, ҳифзи арзишҳои миллӣ ва дастовардҳои даврони истиқлолият ва ба ин васила муаррифии дастовардҳои ҷавонони соҳибистеъдод Раёсати ҷавонон, варзиш ва сайёҳии шаҳри Душанбе дар мавзӯи «Душанбе-оинаи миллати соҳибтамаддуни тоҷик» озмуни мақолаи беҳтарин эълон мекунад.
Тавре аз Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон хабар доданд, дар озмун ҷавонони 14-30-сола иштирок карда, вобаста ба мавзӯъ ва инъикоси дастовардҳои даврони истиқлолият, муҳимияти сулҳу ваҳдат, фарҳанги шаҳрнишинӣ, ҳадафҳои эълони Соли ҷавонон метавонанд маводи худро пешниҳод намоянд.
Озмун дар се зина-миёни кормандони ташкилоту корхонаҳо, марказҳои илмӣ-тадқиқотӣ, рӯзноманигорон, адибон, олимону муҳаққиқони ҷавон; миёни донишҷӯёну устодон, муассисаҳои таҳсилоти касбиву олӣ ва миёни омӯзгорону хонандагони муассисаҳои таҳсилоти миёнаи умумии шаҳри Душанбе гузаронида шуда, дар арафаи Рӯзи ҷавонони Тоҷикистон-23 май натиҷагирӣ карда мешавад.