Эмомалӣ Раҳмон: «Исфара яке аз шаҳрҳои асосии саноативу кишоварзии мамлакат ва гӯшаи зебоманзараи Тоҷикистон мебошад»

ДУШАНБЕ, 24.03.2017. /АМИТ «Ховар»/. Исфара яке аз шаҳрҳои асосии саноативу кишоварзии мамлакат ва гӯшаи зебоманзараи Тоҷикистони азизамон буда, бо деҳқонони асил ва мардуми заҳматдӯст, инчунин, боду ҳавои хушу гуворо, боғҳои шаҳдрез ва меъмории ба худ хосаш шуҳрат дорад. Ин суханонро Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон имрӯз зимни суханронии худ дар рафти шиносоӣ бо вазъи соҳаҳои гуногуни иқтисодиву иҷтимоӣ ва дастоварду пешравиҳои мардуми шаҳри Исфара баён намуданд.
Пешвои миллат инчунин иброз доштанд: «Исфара яке аз шаҳрҳои калонтарини кишвари мо буда, бо донишмандону олимон, шоирону нависандагон, табибон ва хунёгарони машҳури худ Сайфи Исфарангӣ, Мушриф ва Беҳҷати Исфарангӣ, Зебопарӣ ва Умар Ҳофиз, Лутфулло Бузургзода ва дигарон дар ҳақиқат шуҳратёр мебошад».