Конфронси илмӣ-амалии ҷумҳуриявӣ дар Донишкадаи иқтисод ва савдои Хуҷанд

ХУҶАНД, 03.03.2017. /АМИТ «Ховар»/. — «Паём, ҷавонон ва саҳми онҳо дар рушди ҳаёти иҷтимоиву иқтисодии ҷомеа»- таҳти ин унвон дар Донишкадаи иқтисод ва савдои ДДТТ дар шаҳри Хуҷанд конфронси илмӣ-амалии ҷумҳуриявӣ  баргузор гардид.

Тавре ба хабарнигори АМИТ «Ховар» аз Раёсати донишкада иттилоъ доданд, конфронс бо ташаббуси шуъбаи илм ва инноватсияи донишкада дар партави Паёми Асосгузори сулҳу Ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон рӯи кор омада,  дар он намояндагони муассисаҳои таҳсилоти олии вилояти Суғд ширкат варзиданд

Конфронс  бо се забон: тоҷикӣ, русӣ ва англисӣ гузаронида шуда, дар он аз ҷониби устодону магистрантон ва аспирантон панҷ маърӯзаи илмӣ оид ба  масъалаҳои ҷавонон, Даҳсолаи нави байналмилалӣ оид ба об ва иқтисодиёти мамлакат шунида шуданд.

Дар конфронс, ки дар сатҳи баланди илмӣ ва амалӣ баргузор шуд, таъкид гардид, ки маҳз бо ташаббуси Президенти Ҷумҳурии Тоҷикистон муҳтарам Эмомалӣ Раҳмон вобаста ба мушкилоти оби нӯшокӣ дар минтақаҳои гуногуни ҷаҳон ва ҳалли ин муаммо Даҳсолаи нави байналмилалии амал «Об барои рушди устувор» барои солҳои 2018-2028 дар ҷаласаи Маҷмаи умумии Созмони Миллали Муттаҳид аз ҷониби 177 давлати ҷаҳон пазируфта шуд.