Коргардони мусиқии Радиои «ХоварFM» сазовори Ҷоизаи «Суруди сол» гардид!

ДУШАНБЕ, 12.03.2017./АМИТ «Ховар»/. 5 март дар толори Филармонияи давлатии Тоҷикистон ба номи Акашариф Ҷӯраев маросими ҷоизасупории Озмуни ҷумҳуриявии «Суруди сол-2016» баргузор гардид. Ин озмун муддати 10 сол аст, ки аз ҷониби Вазорати фарҳанги Ҷумҳурии Тоҷикистон гузаронида мешавад.

Қобили хушнудист, ки дар қатори сарояндагони маъруф аз қабили Ҳунарманди халқии Тоҷикистон Сурайё Қосимова, Нигина Амонқулова, Нигора ва Суруш Холовҳо, Меҳринигори Рустам, гуруҳи «Parem» ва дигарон ҳамкори мо – коргардони мусиқии Радиои «ХоварFM», овозхони ҷавону боистеъдод Соҳиб Назриев низ сазовори Ҷоизаи «Суруди сол-2016» шуд.

Соҳиб Назриев суруди нави худро бо номи «Бекарорам имшаб», ки ба василаи такмили замонавии суруди машҳури «Дилбарҷон»- и Ҳофизи халқии Тоҷикистон Акашариф Ҷӯраев офаридааст, ба озмун пешниҳод намуда, ғолиб омадааст.

Мавриди зикр аст, ки Озмуни «Суруди сол-2016» дар чанд давра сурат гирифт ва ғолибонро худи тамошобинону шунавандагон тавассути –SMS-паёмакҳо муайян намуданд.

Ин дафъа озмун бо дастгирии ширкати «Ориёно Медиа» баргзор карда шуд. Хотиррасон менамоем, ки дар тӯли фаъолияти худ ин  ширкат дар Душанбе ва дигар шаҳрҳои Тоҷикистон беш аз 40 лоиҳаи фарҳангӣ, аз ҷумла сафари ҳунарии Театри Калони Москва, консертҳои «Фабрика звезд-3», «Иванушки», «Блестяшие», Лада Дэнс, Владимир Пресняков, Лайло Фуруҳар ва ғайраро  амалӣ намудааст.