Наврӯз нишонаи олии хубию покӣ ва дӯстию ҳамдилӣ мебошад

ДУШАНБЕ, 21.03.2017 /АМИТ «Ховар»/. Имрӯз бахшида ба ҷашни Наврӯзи байналмилалӣ дар шаҳри Душанбе тантанаҳои идона ҷараён доранд. Аз ҷумла, дар «Боғи Рӯдакӣ» низ фазои идона фароҳам оварда шудааст, ки мардум бо рӯҳияи идона вориди боғ гардида, бо аҳли оилаи худ хурсандӣ доранд.
Мавлуда Каримова, як нафар сокини пойтахт, ки бо кӯдакони худ ба тамошои ин ҷашн омадааст, зикр кард, ки Наврӯз аз қадимтарин ва зеботарин ҷашни ориёиҳо мебошад.
«Наврӯз иди аҷдодон ва гузаштагони мо буда, ба мо ҳамчун мерос боқӣ мондааст. Арҷгузорӣ ба ин ҷашни миллӣ- арҷгузорӣ ба расму ойини гузаштагон мебошад. Наврӯз оғози рӯзу моҳу соли нав аст. Моро мебояд, ки бо ин мероси аҷдодони худ ифтихор намоем».
Ғайрат Идиев, истиқоматкунандаи ноҳияи Рӯдакӣ чунин иброз дошт: «Наврӯз, ки иди байналмилалӣ эълон гардид, моро боз ҳам шод гардонид. Акнун ин ҷашни фархундаро дар тамоми ҷахон бо шукӯҳу шаҳомати хосса таҷлил мекунанд. Наврӯз нишонаи олии хубию покӣ, дӯстию ҳамдилӣ ва иди сафову эҳёи табиат мебошад».