Наврӯзии вилояти Суғд дар боғи миллии «Ваҳдат»-и ноҳияи Б. Ғафуров доир мегардад

ХУҶАНД, 17.03.2017. /АМИТ «Ховар»/. Имрӯзҳо дар тамоми минтақаҳои кишварамон, аз ҷумла, шаҳру ноҳияҳои шимоли мамлакат баҳри дар сатҳи хуби ташкили  ва ифтихор аз мероси ниёгон таҷлил намудани Наврӯзи байналмилалии хуҷастапай омодагиҳо ҷараён доранд. Тибқи нақшаи чорабиниҳои Мақомоти иҷроияи ҳокимияти давлатии вилояти Суғд 21 ва 22 март дар ҳамаи шаҳру навоҳии вилоят барномаҳои идонаи наврӯзӣ гузаронида мешаванд.

Ҳамчунин соли равон барномаи калони фарҳангии Наврӯзи вилоятӣ бо иштироки меҳмонони олимақом аз тамоми минтақаҳои кишвар ва бевосита Пешвои миллат, Президенти мамлакат  Эмомалӣ Раҳмон дар охири даҳаи сеюми моҳи март дар боғи миллии «Ваҳдат»-и ноҳияи Бобоҷон Ғафуров доир мегардад.

Тавре хабарнигори минтақавии АМИТ  «Ховар» хабар дод, мутобиқ ба иттилои  Раёсати фарҳанги вилояти Суғд имрӯзҳо омодагӣ ба таҷлили Наврӯзи хуҷастапай дар сатҳи зарурӣ қарор дошта, баҳри баргузории ин чорабинии бошукӯҳ беш аз 10 ҳазор нафар иштирокчиён, намояндагони ҳамаи бахшҳои хоҷагии халқ ва ҳамчунин донишҷӯёни макотиби олӣ ҷалб гардидаанд. Дар ин рӯз ҳар як шаҳру ноҳия дастовардҳои худро ба намоиш гузошта, бо намоиши хаймаҳои милливу растаҳои ҳунармандон ва бахши театрикунонидашуда барномаҳои фарҳангии худро  манзури иштирокдорон мегардонанд.