Озмуни наттоқони забони ҷопонӣ ҷамъбаст шуд

ДУШАНБЕ, 13.03.2017 /АМИТ «Ховар»/. 11 марти соли равон бо иштироки Китаока Ҳаҷиме, Сафири Фавқулода ва Мухтори Япония дар Ҷумҳурии Тоҷикистон ва Танабе Ҳидеки, роҳбари намояндагии JIСА дар Ҷумҳурии Тоҷикистон озмуни наттоқони забони ҷопонӣ баргузор гардид. Озмун ҳамасола бо мақсади равнақ бахшидани омӯзиши забони ҷопонӣ бо дасгирии Сафорати Япония дар Ҷумҳурии Тоҷикистон дар ҳамкорӣ бо Донишкадаи давлатии забонҳои Тоҷикистон (ДДЗТ) ба номи Сотим Улуғзода баргузор мегардад. Дар ин бора аз Донишкадаи давлатии забонҳои Тоҷикистон хабар доданд,
Дар озмуни навбатӣ 20 нафар довталабон аз Донишкадаи давлатии забонҳои Тоҷикистон, Донишгоҳи (славянии) Россияву Тоҷикистон ва Гимназияи «Ҳотам ПВ» аз рӯи шартҳои сухангӯӣ бо забони ҷопонӣ, қироати шеър ва ҳикоя бо забони ҷопонӣ иштирок намуданд.
Дар ҷамъбаст Гулизор Нурова аз ДДЗТ сазовари ҷойи якум, Фирӯза Нурова аз ДДЗТ сазовори ҷойи дуюм ва Сурайёи Абдуқосим аз гимназияи «Ҳотам ПВ» сазовори ҷойи сеюм гардиданд.