Пагоҳ маҳфили журналистикаи иқтисодӣ -«Тавозун» баргузор мегардад

ДУШАНБЕ, 01.03.2017 /АМИТ «Ховар»/. Пагоҳ дар Маркази матбуоти ҷумҳуриявии АМИТ «Ховар» маҳфили навбатии «Тавозун» бахшида ба муҳокимаи иқтидори мамлакат дар такмили идораи молияи давлатӣ баргузор мешавад.
Тавре Лола Мерганова аз Ташкилоти ҷамъиятии «Хома» хабар дод, дар он намояндагони Вазорати молияи Ҷумҳурии Тоҷикистон, Вазорати рушди иқтисод ва савдои Ҷумҳурии Тоҷикистон, Маркази тадқиқоти стратегии назди Президенти Ҷумҳурии Тоҷикистон, Парлумони Тоҷикистон, намояндагони DFID, роҳбарони қисматҳои барномаи «Дастгирии идоракунии молияи давлатӣ», намояндагони ВАО, таҳлилгарон ва коршиносони соҳаи иқтисод иштирок мекунанд.
«Намояндагони Вазорати молияи Ҷумҳурии Тоҷикистон оид ба ислоҳот дар идораи молияи давлатии Ҷумҳурии Тоҷикистон маълумоти муфассал пешниҳод мекунанд. Инчунин барномаи «Дастгирии идоракунии молияи давлатӣ дар Ҷумҳурии Тоҷикистон», ки аз ҷониби Вазорати рушди байналмилалии Британияи Кабир (DFID) маблағгузорӣ мешавад, муаррифӣ мегардад»,-хабар дод манбаъ.
Маҳфилро Ташкилоти ҷамъиятии «Хома» дар доираи лоиҳаи «Дастгирии идоракунии молияи давлатӣ дар Ҷумҳурии Тоҷикистон» баргузор менамояд.