«Паём-ҳидоятномаи миллат» тавассути «Нури маърифат» ба нашр расид

ДУШАНБЕ, 30.03.2017 /АМИТ «Ховар»/. Маҷмӯаи мақолаҳо роҷеъ ба Паёми Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олӣ, дар партави 20-солагии Рӯзи Ваҳдати миллӣ, Соли ҷавонон ва 85-солагии Донишгоҳи давлатии Хуҷанд ба номи академик Бобоҷон Ғафуров таҳти унвони «Паём-ҳидоятномаи миллат» тариқи нашриёти «Нури маърифат» ба нашр расид.
Тавре аз Маркази иттилоот ва таҳлили раёсати Донишгоҳи давлатии Хуҷанд хабар доданд, дар маҷмӯа якчанд мақолаҳои таҳлилии устодони ин донишгоҳ, аз ҷумла «Паёми Пешвои миллт-ҳидоятномаи аҳли илм ва маориф», «Паёми ояндасоз», «Паёми ояндаи ободу осуда», «Паёми Пешвои миллат-дастур ба ҷавонон дар роҳи бунёди ҷомеаи муосир», «Роҳнамо ба сӯйи фардои дурахшон», «Паёми саодати халқ ва ояндаи дурахшони миллат» гирд оварда шудаанд.
Маҷмӯаи мазкур 16-умин китоб дар чаҳорчӯбаи силсилаи «Раҳнамои тарбият» мебошад, ки ҳамасола аз тарафи Донишгоҳи давлатии Хуҷанд барои устодон ва роҳбарони гурӯҳҳои академикӣ нашр мегардад.