Саҳми ДМИТ дар ободкорӣ назаррас аст

ДУШАНБЕ, 06.03.2017 /АМИТ «Ховар»/. Дирӯз бо мақсади сабзазоркунӣ, ниҳолшинонӣ, ободу зебо ва тозаву озода нигоҳ доштани биноҳои таълимӣ ва хобгоҳҳои донишҷӯёну кормандони Донишкадаи молия ва иқтисоди Тоҷикистон бо азму иродаи қавӣ ҳамаи кормандону донишҷӯёни донишкада ба ҳашари умумӣ баромаданд.

Дар ҳашар масъулон аз раёсати донишкада, устодону кормандон ва донишҷӯён, дар маҷмӯъ  зиёда аз 850 нафар иштирок намуда, атрофи роҳи калони кӯчаи Борбад то кӯчаи Нахимови ноҳияи Синоро ба тартиб дароварда, ҷӯйборҳоро тоза карданд.

Ҳамчунин як қисми донишҷӯёну кормандон атрофи ин таълимгоҳро тоза карда, заминҳоро побел ва бехи дарахту буттаҳоро мулоим карданд. Ҳамзамон иштирокчиёни ҳашар синфхонаҳо, ҳуҷраҳои корӣ ва хобгоҳҳои донишҷӯёнро тозаву поккорӣ карда, барои ободу зебо гардонидан ва тозаву озода нигоҳ доштани онҳо саҳми назаррас гузоштанд.