Сафири Тоҷикистон дар Чин аз Донишгоҳи Венҷоуи дидан кард

ДУШАНБЕ, 15.03.2017 /АМИТ «Ховар»/. Дар доираи ҳамкории дуҷониба Сафири Ҷумҳурии Тоҷикистон дар Ҷумҳурии Мардумии Чин Парвиз Давлатзода аз Донишгоҳи Венҷоуи музофоти Ҷеҷианг дидан кард.
Тавре аз Вазорати корҳои хориҷии умҳурии Тоҷикистон хабар доданд, сафир бо ректори Донишгоҳ профессор Ли Сяокун вохӯрӣ намуд, ки зимни он масъалаҳои барқарор намудани робитаҳои илмӣ, эҷодӣ ва омӯзишии Донишгоҳи Венҷоу бо шарики муносиб аз Ҷумҳурии Тоҷикистон баррасӣ гардид.
Сипас сафири Тоҷикистон бо Осорхона, Маркази фарҳангӣ, Маркази соҳибкорӣ ва инноватсионии Донишгоҳи зикргардида шинос шуда, инчунин бо гурӯҳи донишҷӯёни факултетҳои соҳибкорӣ, молиявию иқтисодӣ ва фарматсевтӣ мулоқот намуд. П.Давлатзода оид ба таърихи робитаҳои дӯстона ва шарикии стратегӣ байни Тоҷикистону Чин, инчунин дар бораи рушди илм ва маориф дар Ҷумҳурии Тоҷикистон суҳбат намуда, ҳадафи асосии ташрифи худро дар мустаҳкам намудани муносибатҳои илмию таълимии кишварҳои бо ҳам дӯст Тоҷикистону Чин маънидод намуд.