«Сарсабзии ҳаёт аз об аст»-конфронси илмӣ-назариявӣ дар шаҳри Ваҳдат

ВАҲДАТ, 14.03.2017. /АМИТ «Ховар»/. Бахшида ба қатъномаи Даҳсолаи байналмилалии амал «Об барои рушди устувор», солҳои 2018-2028 Коллеҷи омори шаҳри Ваҳдат дар мавзӯи  «Сарсабзии ҳаёт аз об аст» конфронси  илмӣ-назариявӣ  доир намуд. Дар он омӯзгорон  дар мавзӯъҳои  «Об-рўшноӣ» ва  «Об сафобахши зиндагист» маърӯзаҳо хонда,  аз тарафи донишҷўён дар васфи об шеърҳо қироат шуданд.

Дар ин бора масъулини коллеҷ ба хабарнигори АМИТ «Ховар» иттилоъ доданд.
Дар конфронс зикр гардид, ки Тоҷикистон ташаббускори асосии баргузор шудани симпозиуму қабул шудани қатъномаҳои СММ дар масъалаи об мебошад. Хушбахтона, чанде пеш Қатъномаи  навбатии СММ оид ба эълон намудани Даҳсолаи навбатӣ доир ба амалиёти «Об барои рушди устувор», ки аз ҷониби Пешвои миллати мо пешниҳод шудааст, қабул гардид.