Шариф Шарифзода: «Қабули Даҳсолаи «Об барои рушди устувор» аз сиёсати муваффақи Президенти Тоҷикистон дар арсаи байналмилалӣ дарак медиҳад»

ХУҶАНД, 09.03.2017. /АМИТ «Ховар»/. — «Об барои рушди устувор»- таҳти ин унвон бо ибтикори Мақомоти иҷроияи ҳокимияти давлатии шаҳри Хуҷанд дар Донишкадаи политехникии Донишгоҳи техникии Тоҷикистон дар шаҳри Хуҷанд конфронси илмӣ-амалӣ баргузор шуд. Дар он раиси шаҳри Хуҷанд Шариф Шарифзода, сарварони мактабҳои олии вилоят, олимону муҳаққиқон, устодону коршиносони соҳа ва донишҷӯён ширкат намуданд.

Тавре хабарнигори минтақавии АМИТ «Ховар» иттилоъ дод, Шариф Шарифзода роҷеъ ба моҳият ва ташаббуси Пешвои миллат, Президенти Ҷумҳурии Тоҷикистон Эмомалӣ Раҳмон сухан карда, аз ҷумла иброз дошт, ки қабули муваффақонаи қатъномаи Даҳсолаи байналмилалии амал «Об барои рушди устувор», 2018-2028 дар Маҷмааи Умумии Созмони Милали Муттаҳид, ки бо ташаббуси навбатии Асосгузори сулҳу ваҳдати миллӣ- Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон рӯи кор омадааст, боиси ифтихори кулли мардуми Тоҷикистон буда, он чун  сиёсати муваффақи Президенти Тоҷикистон дар арсаи байналмилалӣ ба ҳисоб меравад.

Ба андешаи раиси шаҳри Хуҷанд,  захираҳои обӣ,  идоракунии захираҳои обӣ, тақсимоти захираҳои обӣ ва таъмини сокинони сайёра бо оби ошомиданӣ мушкилоти ҷаҳонӣ ба ҳисоб рафта, ташаббуси навбатии Пешвои миллат аз дурбиниву ҷаҳоншиносии Сарвари давлати тоҷикон дарак дода, дар таъмини зиндагии ободу пешрафтаи на танҳо мардуми Тоҷикистон, балки тамоми дунё таъсири нек хоҳад гузошт.

Дар конфронс оид  ба истифодаи сарфакоронаи об, дастрасӣ ба оби тоза ва таъмини пурраи аҳолии шаҳри Хуҷанд бо оби тозаи ошомиданӣ ибрози назар карда шуд.