Шиносоии Сарвазир бо ҷараёни корҳои соҳилмустаҳкамкунӣ ва омодагӣ ба мавсими нави обёрӣ дар вилояти Хатлон

Март 16, 2017 09:08

ДУШАНБЕ, 15.03.2017 /АМИТ «Ховар»/. Сарвазири мамлакат Қоҳир Расулзода зимни сафари корӣ бо ҷараёни корҳои соҳилмустаҳкамкунӣ ва омодагӣ ба мавсими нави обёрӣ дар шаҳру ноҳияҳои вилояти Хатлон шинос шуд.
Ҳадаф аз сафари Сарвазири мамлакат ба шаҳру ноҳияҳои вилояти Хатлон таъмини иҷрои дастуру супоришҳои Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон аст, ки дар ҷаласаи Комиссияи Ҳукумати Ҷумҳурии Тоҷикистон оид ба ҳолатҳои фавқулода дода шуда буданд.
Сарвазири мамлакат ва ҳайъати Ҳукумати Ҷумҳурии Тоҷикистон нахуст аз мавзеи навсозии фурудгоҳи Қӯрғонтеппа дидан карда, бо ҷараёни корҳои соҳилмустамкамкунӣ дар атрофи фурудгоҳ ва навсозии хатти парвози он шинос шуданд.
Хотиррасон бояд кард, ки бо дастгирии бевоситаи Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон фурудгоҳи Қӯрғонтеппа навсозӣ гардида, хатти парвози он то 165 метр дароз карда мешавад.
Бо анҷоми муваффақи ин амал фурудгоҳи Қӯрғонтеппа ба меъёрҳои байналмилалӣ мутобиқ гардонида шуда, теъдоди парвозҳо зиёд мешаванд.
Дар ноҳияи Бохтар Сарвазири мамлакат аз мавзеъҳои хавфноки назди соҳили деҳоти Бохтариён дидан карда, бевосита бо ҳолати корҳои соҳилмустаҳкамкунӣ ва кўчонидани аҳолӣ ба ҷойҳои бехавф шинос шуд.
Бояд гуфт, ки дар доираи дастуру супоришҳои Пешвои миллат муҳтарам Эмомалӣ Раҳмон тамоми шаҳру ноҳияҳои вилояти Хатлон, ки дар наздикиҳои рӯду дарёҳо ҷойгир мебошанд, бо масолеҳи сохтмонӣ ва сӯзишворӣ таъмин карда шудаанд.
Корҳои таҳкими соҳил дар ноҳияи Панҷ дар мавзеи канали Ҳалқаёр дуруст ба роҳ монда шуда, барои пешгирӣ аз хавфу хатари обхезиҳо тадбирҳои бетаъхир андешида мешаванд.
Дар шаҳри Кўлоб Сарвазири мамлакат бо ҷараёни корҳои таҳкими соҳил дар мавзеъҳои сойи Даҳана, Тебалай ва дарёи Ёхсу шинос шуда, дар ноҳияи Восеъ аз мавзеъҳои наздисоҳилии Кафтархона ва Ҳоҷаи Шом дидан карданд.
Иҷрои тадбирҳои саривақтии соҳилмустаҳкамкунӣ ва тадбирҳои пешгирӣ аз хавфу хатарҳои ногувори ҳолатҳои фавқулода дар доираи дастуру супоришҳои Сарвари давлат амали муҳим шуморида шуд.
Сипас Сарвазири мамлакат бо ҳолати кор дар ноҳияҳои Фархор ва Мир Саид Алии Ҳамадонӣ шинос шуд.
Дар ин ноҳияҳо мавзеъҳои назди соҳили дарёи Панҷ, ки нисбатан хавфу хатар доранд, бо дастгирии бевоситаи роҳбарияти давлату Ҳукумат таҳким бахшида шуда, корҳои соҳилмустаҳкамкунӣ бо маром идома доранд.
Дар ҷараёни шиносоӣ Сарвазири мамлакат роҳбарияти вазорату идораҳо, вилоят ва шаҳру ноҳияҳоро барои иҷрои босифати корҳои соҳилмустаҳкамкунӣ, пешгирӣ аз ҳама ҳолатҳои фавқулода ва таъмини амнияту бехатарии аҳолию иншооти таъминоти гуногун ва иҷрои бетаъхири дастуру супоришҳои Президенти Ҷумҳурии Тоҷикистон муҳтарам Эмомалӣ Раҳмон вазифадор намуд.

Март 16, 2017 09:08

Хабарҳои дигари ин бахш

Пагоҳ дар Агентии омор, Бонки миллӣ, Палатаи ҳисоб ва Хадамоти гумрук нишасти матбуотӣ баргузор мегардад
Ширкати «Париматч Тоҷикистон» бо «Лигаи футболи Тоҷикистон» шартномаи ҳамкориро идома дод
Дар Маҷмааи сайёҳии «Сафеддара» Форуми блогерон баргузор мегардад
Имрӯз дар баъзе ноҳияҳои Тоҷикистон бориши борон ва барф дар назар аст
Имрӯз дар вазоратҳои корҳои хориҷӣ, рушди иқтисод ва савдо, меҳнат, муҳоҷират ва шуғли аҳолӣ, Кумитаи давлатии сармоягузорӣ ва идораи амволи давлатӣ, ҷамъиятҳои саҳомии кушодаи «Барқи Тоҷик», «Шабакаҳои интиқоли барқ» ва «Шабакаҳои тақсимоти барқ» нишасти матбуотӣ баргузор мегардад
«БЕҲТАРИН ЁРИ ВАФОДОР КИТОБ АСТ, КИТОБ». Имрӯз дар Душанбе беш аз 15 ҳазор нусха китоб ба намоиш-фурӯш пешниҳод гардид
НИШАСТИ МАТБУОТӢ. Соли 2024 бо шарофати дастоварди варзишгарони Тоҷикистон 134 маротиба Суруди миллӣ дар мусобиқаҳои сатҳи байналмилалӣ садо додааст
Дар Суғд барои дарёфти Ҷоизаи журналистони вилоят ба номи Ҳоҷӣ Содиқ озмун гузаронида мешавад
Пагоҳ дар вазоратҳои корҳои хориҷӣ, рушди иқтисод ва савдо, меҳнат, муҳоҷират ва шуғли аҳолӣ, Кумитаи давлатии сармоягузорӣ ва идораи амволи давлатӣ, ҷамъиятҳои саҳомии кушодаи «Барқи Тоҷик», «Шабакаҳои интиқоли барқ» ва «Шабакаҳои тақсимоти барқ» нишасти матбуотӣ баргузор мегардад
ҲИСОББАРОБАРКУНИИ ҒАЙРИНАҚДӢ. 64 фоизи аҳолии калонсоли ноҳияи Шаҳринав дорандаи корти бонкӣ мебошанд
«Бисоз Life»: 2,5 маротиба бештар суҳбат намоед!
Имрӯз дар Тоҷикистон борон ва барф дар назар аст