Ширкати «Помирэнерҷӣ» ба 100 нафар тарбиятгирандагони Мактаб- интернати ноҳияи Рӯшон туҳфаҳои наврӯзӣ тақдим кард

ХОРУҒ, 21.03.2017. /АМИТ «Ховар»/. Кормандони ширкати барқии «Помирэнерҷӣ» соли чаҳорум боз дар ҳар як иду маросими миллӣ ба аёдати тарбиятгирандагони Мактаб-интернати ҷумҳуриявӣ меоянд ва ба онҳо маводи гуногуни хониш ва либос туҳфа мекунанд. Сухангӯи Маркази матбуоти ин ширкат Игор Насиллобеков дар суҳбат ба хабарнигори АМИТ «Ховар» гуфт, ки «пас аз дастури Пешвои миллат ба раҳбарони идораву муассисаҳо ва соҳибкорону тоҷирон дар хусуси дастгирии оилаҳои камбизоат ва ятимону бепарасторон ширкати мо тасмим гирифт, ки аз ин ба баъд сарпарастии Мактаб-интернати мазкурро ба уҳда гирад. Мо на танҳо дар рӯзҳои иду маросим ба онҳо туҳфа тақдим мекунем, балки ҳар мушкиле, ки дар ин таълимгоҳ пеш ояд, дар ҳалли он саҳм мегузорем».
Ба гуфтаи Игор Насиллобеков, дар остонаи иди Наврӯз ширкати онҳо ҳамчунин ба хонаводаи камбизоати маҳаллаи Хоруғи боло ба маблағи 2 ҳазор сомонӣ либосворию озуқа кумак намуд.