Соҳаи тандурустии вилояти Хатлон рушд меёбад

ДУШАНБЕ, 02.03.2017 /АМИТ «Ховар»/. Бо мақсади рушди соҳаи тандурустӣ ва дастгирӣ дар самти беҳдошти сифати хизматрасонӣ ба аҳолӣ, гурӯҳи коршиносон аз Ташкилоти умумиҷаҳонии татндурустӣ ба вилояти Хатлон омаданд. Тавре ки аз шуъбаи иттилоотию таҳлилии дастгоҳи раиси вилояти Хатлон хабар доданд, зимни вохӯрӣ ҷонибҳо дар доираи лоиҳаи ҳамкорӣ дар соҳаи тандурустӣ дар самти ташкил намудани клиникаи мобилии бисёрсоҳа дар шаҳрҳои Кӯлоб ва Қӯғонтеппа ба мувофиқа расиданд. Дар назар аст, ки таҷҳизоти зарурӣ аз ҷониби ҳамкории техникии давлати Ҳолланд моҳи октябри соли 2017 вориди вилоят шаванд.
Аз ҷумла, дар Маркази ҷарроҳии вилояти Хатлон намудҳои нави ҷарроҳӣ, аз қабили невриномаи қисми камари ҳароммағз, остеомаи устухони тораки косахонаи сар, менингомаи мағзи сар гузаронида мешаванд, ки мушкилоти шаҳрвандони вилоятро хеле осон намудааст.
Беморони вилоят имкон доранд бе харҷи барзиёд дар муассисаҳои тиббии вилоят ҷарроҳӣ шаванд.
Бояд гуфт, ки ин кор бо ворид гардидани таҷҳизоти муосири тиббӣ ба муассисаҳои соҳаи тандурустии вилояти Хатлон ва баланд гардидани сатҳи касбии кормандони он роҳандозӣ гардид.