Сокини шаҳри Исфара бо гумони қатли ҳамсар дар заминаи рашк дастгир шуд

ДУШАНБЕ, 17.03.2017. /АМИТ «Ховар»/. Вазорати корҳои дохилии Ҷумҳурии Тоҷикистон аз як ҷинояти куштор, ки дар заминаи рашк содир шудааст, хабар медиҳад.
Тавре аз ин ниҳод хабар доданд, зимни гузаронидани чорабиниҳои фаврӣ-ҷустуҷӯӣ марди 45-солаи сокини шаҳри Исфара аз ҷониби кормандони милитсия бо гумони содир намудани ҷинояти куштор дастгир карда шуд. Гумонбаршуда, 15 марти соли 2017, тахминан соати 22:30 дар хонаи истиқоматиаш аз сабаби муноқишаи ба миён омада ва аз ҳиссиёти рашк, ҳамсари 40-солаашро бо мушту лагад ба сару рӯй ва аъзои баданаш зада, ба ҳалокат расонидааст.
«Аз рӯи далели мазкур парвандаи ҷиноятӣ оғоз гардида, тафтишот идома дорад»,-иттилоъ доданд аз Вазорати корҳои дохилӣ.