Таҷлили ҷашни Наврӯз дар шаҳри Истанбул

Анқара, 22.03.2017 /АМИТ «Ховар»/.  Бо ташабусси Консулгарии генералии Ҷумҳурии Тоҷикистон дар шаҳри Истанбул Иди Наврӯзи хуҷастапай бо шукӯҳи хоса дар ҳалқаи ҳамватанон ва донишҷуёни тоҷик баргузор гардид. Дар чорабинии Наврузӣ зиёда аз 150 нафар ҳамватанон ва донишҷӯёни тоҷики муқими аз Истанбул ва дигар ноҳияҳои атрофи вилояти Истанбул иштирок намуданд.
Дар барномаи Наврузӣ Консули генералии Ҷумҳурии Тоҷикистон дар Истанбул Мизробиддин Сафаров суханронӣ карда, ҳамватанон ва донишҷуёни тоҷикро ба муносибати Иди байналмиллалии Наврӯз ва оғози фасли баҳор самимона табрику муборакбод намуд ва ҳозиринро ба таҳкими дӯстӣ, поксозии қалбҳо ва ваҳдату ягонагӣ даъват кард.
Дар ҷашни Наврӯзӣ дастурхони идонаи ҳафтсину ҳафтшин бо суманак ва дигар хурокҳои миллӣ ороста шуда, таҳти садои суруду мусиқии халқӣ, мероси бойи аҷдодонамон, намунаи ҳунарҳои мардумӣ, асарҳои косибӣ, либосҳои миллӣ, китобҳо оид ба фарҳанги мардуми Тоҷикистон ва маводҳои таблиғотӣ доир ба муаррифии симои мусбии кишварамон ба манзури иштирокчиён пешкаш гардиданд.
Дар чорабинии мазкур инчунин меҳмонон, донишҷӯёни тоҷик ва роҳбарони баъзе Донишгоҳҳои муқими Истанбул суханронӣ карда, ҳозиринро бо фарорасии Иди байналмиллалии Наврӯзи аҷам табрику муборакбод намуданд.