Таъсиси Шӯрои кор бо ҷавонон дар маҳаллаҳои шаҳри Хуҷанд

ХУҶАНД, 03.02.2017. /АМИТ «Ховар»/. Баҳри таҳким ва ҷоннок намудани  фаъолияти  кор бо ҷавонон ва дар ин замина ташкили маҳфилу суҳбатҳо дар маҳалҳо ва ҳамчунин тарбияи ҷавонон дар рӯҳияи ватанпарастиву хештаншиносӣ, ифтихор аз истиқлолияти давлатӣ дар 22 маҳаллаи шаҳри Хуҷанд Шӯрои кор бо ҷавонон таъсис дода мешавад.

Тавре ба АМИТ «Ховар» роҳбари маркази матбуоти мақомоти иҷроияи ҳокимияти давлатии шаҳри Хуҷанд Маҳмудҷон Муҳаммадӣ хабар дод, ин иқдом тибқи қарори Раиси шаҳри Хуҷанд  Шариф Шарифзода бахшида  ба Соли ҷавонон ва ҳамзамон иҷрои дастуру супоришҳои Президенти Ҷумҳурии  Тоҷикистон  Эмомалӣ Раҳмон  рӯи кор омадааст.

Минбаъд тибқи қарори мазкур Шӯрои кор бо ҷавонони маҳаллаҳо ҳамчун зерсохтори шуъбаи кор бо маҳаллаҳои дастгоҳи Раиси шаҳри Хуҷанд ба ҳисоб рафта, фаъолияти худро дар мувофиқа бо Бахши ҷавонон, варзиш ва сайёҳии шаҳр ба роҳ монда, дар татбики сиёсати давлатии ҷавонон дар   маҳаллаҳо масъулияти асосиро бар дӯш хоҳад дошт.