Теъдоди «Гурдофарид»-ҳои тоҷик афзудааст

ДУШАНБЕ, 07.03.2017 /АМИТ «Ховар»/. Теъдоди занон ва духтарони тоҷик, ки дар мақомоти қудратии кишвар фаъолият доранд, дар зарфи 25-соли Истиқлолияти давлатии Ҷумҳурии Тоҷикистон афзоиш ёфтааст. Ин нуктаро бори дигар Президенти Ҷумҳурии Тоҷикистон Эмомалӣ Раҳмон дар мулоқоти анъанавӣ бо фаъолзанони кишвар, ки имрӯз дар Маҷмааи давлатии «Кохи Борбад»-и пойтахт доир гардид, таъкид намуданд.
«Сол то сол афзоиш ёфтани шумораи занон дар мақомоти судӣ, ҳифзи ҳуқуқ ва сохторҳои низомии кишвар натиҷаи кӯшишҳои пайвастаи Ҳукумати мамлакат доир ба баланд бардоштани мақоми занон мебошад», афзуд Пешвои миллат Эмомалӣ Раҳмон.
Президенти ҷумҳурӣ зикр намуданд, ки тибқи таҳлилҳо айни замон шумораи занон дар мақомоти судии кишвар 235 нафар, Прокуратураи генералӣ 46, Вазорати корҳои дохилӣ қариб 1500, Вазорати мудофиа 400, Агентии назорати давлатии молиявӣ ва мубориза бо коррупсия 24, Агентии назорати маводи нашъаовар 36, Кумитаи ҳолатҳои фавқулода 178 нафар, Хадамоти гумрук 107 ва Гвардияи миллӣ қариб 300 нафарро ташкил медиҳад. Мувофиқи маълумот аз 235 нафар занони дар мақомоти судӣ фаъолиятдошта 122 нафарашон дар шаҳру ноҳияҳои кишвар фаъолият доранд.
Дар мақомоти ҳифзи ҳуқуқ 2755 нафар занон адои хизмат менамоянд, ки аксари онҳо мансабҳои роҳбарикунандаро ишғол мекунанд.
Дар маҷмӯъ, дар мақомоти судӣ 90 нафар ва дар мақомоти ҳифзи ҳуқуқ 745 нафар занон дар мансабҳои роҳбарикунанда фаъолият менамоянд, ки ин омор аз таваҷҷуҳи хосаи Сарвари давлат дар самти баланд бардоштани мақому мартабаи зан-модари тоҷик шаҳодат медиҳад.