Бозии «Истиқлол» ва «Олой»-и Қирғизистонро доварони Япония ҳакамӣ мекунанд

ДУШАНБЕ, 10.04.2017/АМИТ «Ховар»/. Бозии даври сеюми Ҷоми Конфедератсияи футболи Осиёро (КФО) бо иштироки дастаҳои «Истиқолол»-и Душанбе ва «Олой»-и шаҳри Ош доварон аз Япония ҳакамӣ мекунанд. Ин вохӯрӣ 18 апрел, соати 19:00 дар Варзишгоҳи марказии шаҳри Душанбе доир мегардад.
Ҳироюки Кимураи 34-сола довари майдон буда, ба ӯ Наги Тошиюги ва Синдзи Очӣ кумак мерасонанд. Довари эҳтиётӣ Аҳмад Ёқуб Иброҳим аз Урдун таъйин шудааст.
Нозири доварон Анас Ҳоқон аз Австралия ва комиссари бозӣ Башир Шафиқ Абдул Холиқ аз Лубнон мебошанд.
Ҳироюки Кимура 21 бозии байналмилалиро ҳакамӣ карда, як пеналтӣ таъйин намудааст ва ба 59 бозингар корти зард нишон дода, се нафарро аз майдон рондааст.
Ёдрас мешавем, ки «Истиқлол»-и Душанбе дар гурӯҳи «Д» -и бозиҳои Ҷоми КФО бо 4 имтиёз пешсаф мебошад ва ҳарифи ӯ чемпиони Қирғизистон то ҳол ягон имтиёз ба даст наовардааст ва дар зинаи охирин қарор дорад.