Дар Қазоқистон оид ба бемории сил миёни муҳоҷирон семинари омӯзишӣ доир гардид

ДУШАНБЕ, 12.04.2017 /АМИТ «Ховар»/. Дар шаҳри Алмаатои Қазоқистон семинари омўзишӣ барои рўзноманигорон дар мавзўи «Инъикоси бемории сил миёни муҳоҷирони меҳнатӣ тариқи ВАО» баргузор гардид.
Тавре мудири шуъбаи коммуникатсия ва робита бо ҷомеаи Муассисаи давлатии Маркази ҷумҳуриявии ташаккули тарзи ҳаёти солими Вазорати тандурустӣ ва ҳифзи иҷимоии аҳолии Ҷумҳурии Тоҷикистон Сафаралӣ Урунбоев ба АМИТ «Ховар» иттилоъ дод, дар ҳамоиш рўзноманигорон аз Тоҷикистон, Қазоқистон, Қирғизистон ва Ӯзбекистон иштирок намуданд.
Бахтиёр Бобомуродов, директори Лоиҳаи ҲОУП дар Қазоқистон иброз намуд, ки семинар бевосита ба назорати байнисарҳадии бемории сил миёни муҳоҷирони меҳнатӣ бахшида шудааст. Ба гуфтаи номбурда, Лоиҳа аз соли 2015 дар ин самт фаъолият намуда, танҳо дар ин сол 1710 муҳоҷири меҳнатӣ аз ташхис гузаронида шуданд, ки дар натиҷа 22 ҳолати гирифторшавӣ ба бемории сил ошкор гардид.
Ҳамчунин Бахтиёр Бобомуродов зикр кард, ки дар сурати мавриди амал қарор гирифтани Созишнома оид ба назорати байнисарҳадии бемории сил байни муҳоҷирони меҳнатӣ ташхису табобати муҳоҷирон осон мегардад ва ба онҳо имкониятҳои дигар низ дода мешавад.
Семинари омӯзишии «Инъикоси бемории сил миёни муҳоҷирони меҳнатӣ тариқи ВАО» аз ҷониби намояндагони Лоиҳаи ҲОУП дар Қазоқситон ва кумаки молиявии Фонди глобалӣ роҳандозӣ шудааст.