Донишҷӯёни Донишкадаи технология ва менеҷменти инноватсионии шаҳри Кӯлоб ба омӯзиши атласу адрасбофӣ ҷалб мешаванд

ДУШАНБЕ, 05.04.2017 /АМИТ «Ховар»/. Раёсати Донишкадаи технология ва менеҷменти инноватсионӣ дар шаҳри Кӯлоб ҷиҳати ба касбомӯзӣ ҷалб намудани донишҷӯён ва эҳёи ҳунарҳои мардумӣ дар заминаи Парки технологӣ Маркази омӯзиши истеҳсоли атласу адрасро таъсис додааст.
Тавре аз маркази матбуоти Вазорати саноат ва технологияҳои нави Ҷумҳурии Тоҷикистон иттилоъ доданд, айни замон устодон ва мутахассисони ботаҷриба бо истифода аз дастгоҳҳои атласу адрасбофӣ нозукии ин ҳунари аҷдодиро ба занону духтарон меомӯзонанд.
«Бо мақсади ҳарчи бештар ҷалб намудани занону духтарони хонашини минтақаи Кӯлоб раёсати Донишкада ният дорад, ки дар оянда курсҳои кӯтоҳмуддати омӯзишӣ таъсис дода, дар ин замина мутахассисони хуби атласу адрасбофро тайёр намояд»,-хабар доданд аз маркази матбуоти Вазорати саноат ва технологияҳои нави Ҷумҳурии Тоҷикистон .