Хизматрасонии ройгон ба мусофирон боиси хушҳолии душанбегиҳо гардид
![](https://khovar.tj/wp-content/uploads/2017/04/Rojgon.jpg)
ДУШАНБЕ, 10.04.2017 /АМИТ «Ховар»/. Дар шаҳри Душанбе танзими ҳаракати нақлиёти мусофиркаш ва хизматрасонии босифат ба аҳолӣ аз масъалаҳои ҳаётан муҳими соҳаи хоҷагидорӣ маҳсуб мешавад.
Мақомоти иҷроияи маҳаллии ҳокимияти давлатии шаҳри Душанбе ҷиҳати беҳбудӣ бахшидан ба соҳаи мазкур тадбирҳои зарурӣ меандешад. Тавре аз Раёсати иттилоотӣ ва робитаҳои хориҷии дастгоҳи Раиси шаҳри Душанбе хабар доданд, ба муносибати ҷашни Рӯзи пойтахт иқдоми наҷиб-хизматрасонии ройгон ба мусофирон идома меёбад.
Хотиррасон менамоем, ки масъулон ба ин амал 20 марти соли равон иқдом намуда, дар ҳамаи хатсайрҳо ҳар рӯз аз шумораи умумии нақлиёти мусофиркашон (нақлиёти мусофиркашонии тамғаи «Меrsedes Sprinter», автобус ва троллейбус) бонавбат як нақлиёти мусофирбар ба сокинон ва меҳмонони пойтахт ба таври ройгон хизмат мерасонад.
Тавре Хуршед Кабиров, сардори шуъбаи нақлиёт ва нигоҳдории роҳҳои дастгоҳи Раиси шаҳри Душанбе ба хабарнигори АМИТ «Ховар» хабар дод, ин иқдоми наҷиб аз ҷониби Мақомоти иҷроияи маҳаллии ҳокимияти давлатии шаҳри Душанбе ва сохторҳои дахлдори он роҳандозӣ гардида, боиси хушҳолии сокинон ва меҳмонони пойтахт гардидааст.
«Дар арафаи ҷашни Рӯзи пойтахт низ хизматрасонии ройгон ба сокинон ва меҳмонони пойтахтро идома медиҳем. Ронандагони нақлиёти мусофиркаш низ аз он ки ба ин амали хайру савоб даст задаанд, изҳори хушҳолӣ доранд. Кӯшиш дорем, ки сифати хизматрасониро ба мусофирон беҳтар намуда, қаноатмандии онҳоро аз кори хуби нақлиёти мусофиркаш ба даст орем. Дар ин ҷода роҳандозии як қатор тадбирҳоро, ки барои беҳтар гардидани ҳаракати нақлиёти мусофиркаш дар шаҳри Душанбе нигаронида шудааст, дар нақша дорем»,- афзуд Х.Кабиров.
«Ин иқдом дар ҳақиқат иқдоми наҷиб аст ва аз он дастгирӣ бояд кард»,- гуфт Ситора Муродова, сокини маҳаллаи 103- юми пойтахт ва афзуд, ки гап сари 1 ё 2 сомонии роҳкиро намеравад. Муҳим он аст, ки ба ин васила амалҳои хайру савоб, ки ба мардуми мо аз қадим хосанд, тарғиб мегарданд.