Хушнуд Мирзоалиев дар озмуни байналмилалии «Иншои беҳтарин» ба забони куриёӣ дар Қазоқистон сазовори ҷойи аввал гардид

ДУШАНБЕ, 27.04.2017. /АМИТ «Ховар»/. Хушнуд  Мирзоалиев, муҳассили Маркази забономӯзии куриёии Шоҳ Сеҷонги Донишкадаи давлатии забонҳои Тоҷикистон ба номи Сотим Улуғзода дар озмуни байналмилалии  «Иншои беҳтарин» бо забони куриёӣ, ки дар шаҳри Алмаатои Қазоқистон баргузор шуд, сазовори ҷойи аввал гардид.

Тавре аз Донишкадаи давлатии забонҳои Тоҷикистон ба номи Сотим Улуғзода хабар доданд, озмуни мазкур дар Донишгоҳи муносибатҳои байналмилалӣ ва забонҳои ҷаҳонии Қазоқистон ба номи Абилайхон гузаронида шуд. Ғолиби озмун Хушнуд  Мирзоалиев соҳиби сертификат ва туҳфаҳои хотиравӣ гардида, минбаъд метавонад  дар магистратураи Донишгоҳи Сонгюнвани Ҷумҳурии Куриё ройгон таҳсил намояд.

Мавриди зикр аст, ки ҳамасола аз ҷониби Донишгоҳи Сонгюнквани Ҷумҳурии Куриё, ки дорои нуфузи баланд аст, байни давлатҳои Осиёи Миёна, аз ҷумла Тоҷикистон, Қазоқистон, Қирғизистон, Ӯзбекистон  озмуни «Иншои беҳтарин» гузаронида мешавад.