Мӯҳсин Муҳаммадиев: «Мураббӣ ҳеҷ гоҳ аз ҳунарнамоии шогирдонаш қаноатманд намешавад»

ДУШАНБЕ, 05.04.2017 /АМИТ «Ховар»/. Сармураббии дастаи «Истиқлол»-и Душанбе Мӯҳсин Муҳаммадиев баъди ҷамъбасти бозии даври дуюми Ҷоми Конфедератсияи футболи Осиё (КФО) бо дастаи «Алтин Асир»-и Туркманистон, ки шоми дирӯз дар шаҳри Балканобод бо натиҷаи 1:1 ба анҷом расид, бозиро чунин шарҳ дод: «Мураббӣ ҳеҷ гоҳ аз ҳунарнамоии шогирдонаш қаноатманд намешавад. Мо дар ин бозӣ мақсади ғолиб омаданро дар назди худ гузошта будем. Дар қисми якум ҳар ду даста хуб ҳунарнамоӣ карданд. Мо ҳуҷуми бобарор ташкил карда, ҳисобро кушодем, аммо дар нимаи дуюм бартарии соҳибони майдон бештар буд. Фикр мекунам, ки натиҷаи мусовӣ баёнгари ҳақиқии ин бозӣ аст. Ҳама муборизаҳо ҳоло дар пешанд».
Бозингари беҳтарини вохӯрӣ дарвозабони дастаи «Истиқлол»-и Душанбе Никола Стошич эълон гардид.
«Афсӯс мехӯрам, ки мо дар ин бозӣ ба ғалаба комёб нашудем, ҳол он ки метавонистем дар он ғолиб оем. Майдон ба бозӣ мусоид набуд, тӯб гоҳе мепариду гоҳи дигар самташро дигар мекард. Акнун ба вохӯрӣ бо дастаи «Олой» тайёрӣ мебинем»,-гуфт бозингари беҳтарини ин дидор Никола Стошич.
Сармураббии дастаи «Алтин Асир» Язкулӣ Хоҷагелдиев низ хулосаҳои худро нисбат ба ин вохӯрӣ чунин баён кард: «Натиҷаи мусовӣ ҳақиқати ин бозӣ аст. Дар нимаи аввал меҳмонон ба дастаи мо фишор оварданд, аммо дар нимаи дуюм мо бозиамонро дигар кардем. Футболбозони мо нисбат ба ҳариф имкониятҳои зиёди голзанӣ доштанд, вале танҳо як маротиба ба задани гол муваффақ шудем ва ҳисобро баробар кардем».