Мулоқоти Қоҳир Расулзода бо Вазири меҳнат ва шуғли Ҷумҳурии Корея

ДУШАНБЕ, 27.04.2017. /АМИТ «Ховар»/.Имрўз Сарвазири мамлакат Қоҳир Расулзода бо Вазири меҳнат ва шуғли Ҷумҳурии Корея Ли Ки-Квон, ки бо сафари корӣ дар шаҳри Душанбе қарор дорад, мулоқот кард.
Дар мулоқот вазъи кунунӣ ва дурнамои рушди ҳамкорӣ байни Ҷумҳурии Тоҷикистон ва Корея, ки имрўз аз барқароршавии муносибатҳо 25 сол сипарӣ шуд, мавриди баррасӣ қарор гирифт.
Ҷонибҳо аз вазъи ҳамкориҳо дар давоми 25 сол, аз ҷумла кори Комиссияи байниҳукуматӣ оид ба ҳамкориҳои тиҷратию иқтисодӣ ва гуфтушунидҳои сиёсӣ изҳори қаноатмандӣ намуд.
Таъкид карданд, ки талаботи имрўз фаъол намудани ҳамкорӣ дар бахши фарҳангию гуманитариро тақозо менамояд.
Зимни мулоқот ҷонибҳо бори дигар тасдиқ намуданд, ки имкониятҳо барои рушд бахшидани ҳамкориҳои мутақобила зиёданд ва мақомоти марбутаи ду давлатро зарур аст, ки корҳои нақшавиро бо мақсади боз ҳам тавсеа додани робитаҳо ва расидан ба марҳилаҳои нави ҳамкорӣ амалӣ намоянд.
Дар ҳамин замина ҳамкорӣ дар соҳаи муҳоҷират ва бо шуғл фаро гирифтани аҳолӣ муҳим шуморида шуд.
Ҷониби Тоҷикистон ҳавасмандии худро ба таври муташаккилона сафарбар намудани нерўи корӣ ба хориҷи мамлакат, аз ҷумла ба Ҷумҳурии Корея изҳор дошта, муҳимияти ҳарчи зудтар ба имзо расонидани лоиҳаи созишномаи байниҳукуматӣ дар соҳаи муҳоҷирати меҳнатӣ ва ҳифзи ҳуқуқҳои муҳоҷирони меҳнатиро, ки дар баррасии ҷонибҳо қарор дорад, таъкид намуд.