Татбиқи натиҷаҳои музокироти сатҳи олии Тоҷикистон ва Япония муҳокима гардид

ДУШАНБЕ, 17.04.2017./АМИТ «Ховар»/. Дар чаҳорчӯби нахустин ҷаласаи Комиссияи байниҳукуматии Тоҷикистону Япония оид ба ҳамкории иқтисодӣ, техникӣ ва илмӣ вохӯрии ҳайати Ҷумҳурии Тоҷикистон таҳти роҳбарии Вазири рушди иқтисод ва савдои Ҷумҳурии Тоҷикистон Неъматулло Ҳикматуллозода бо Вазири давлатии корҳои хориҷии Япония Нобуо Киши баргузор гардид.
Аз Вазорати рушди иқтисод ва савдои Ҷумҳурии Тоҷикистон ба хабарнигори АМИТ «Ховар» хабар доданд, ки дар мулоқот масъалаҳои ҳамкории мутақобилан судманди ду кишвар, аз ҷумла татбиқи натиҷаи музокироти сатҳи олӣ миёни Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва Сарвазири Япония Синдзо Абэ, ки соли 2015 бо сафари расмӣ ба Тоҷикистон ташриф оварда буд, муҳокима шуданд.
Зарурати роҳандозии ҳамкорӣ дар доираи Комиссияи байниҳукуматии Тоҷикистону Япония зикр гардида, изҳори боварӣ карда шуд, ки доир гардидани нахустин ҷаласаи Комиссияи байниҳукуматӣ ба рушду тавсеаи ҳамкории иқтисодӣ-тиҷоратӣ мусоидат намуда, марҳилаи навро дар густариши минбаъдаи он фароҳам хоҳад овард.