Мақомоти иҷроияи ҳокимияти давлатии шаҳри Душанбе шаҳрвандонро ба озмуни кушод даъват менамояд

ДУШАНБЕ, 23.05.2017. /АМИТ Ховар/. Қарори Раиси шаҳри Душанбе Рустами Эмомалӣ аз 22 майи соли равон «Дар бораи эълони озмуни кушод байни шахсони воқеӣ ва ҳуқуқии ватанию хориҷӣ оид ба таҳияи  нақшаҳои ангоравии иморатсозии хиёбони Борбад, кӯчаҳои Н.Қарабоев ва Соҳилии шаҳри Душанбе»  ба тасвиб расид.

Тавре аз Раёсати иттилоот ва робитаҳои хориҷии дастгоҳи Раиси шаҳри Душанбе  хабар доданд, тибқи  қарори мазкур  озмуни кушод  байни шахсони воқеӣ ва ҳуқуқии ватанӣ барои таҳияи  нақшаҳои ангоравии иморатсозӣ бо инобати гулгашту фаввораҳо, роҳравҳо ва рангу ороиши биноҳои бисёрошёнаи мавҷудаи кӯчаҳои Н.Қарабоев аз буриши хиёбони С.Шерозӣ то буриши кӯчаи Даврии ҷанубӣ, Соҳилӣ аз буриши хиёбони С.Шерозӣ то кӯчаи Даврии ҷанубӣ, хиёбони Борбад аз буриши хиёбони С.Шерозӣ (роҳи лоиҳавии пайвастшавии хиёбони А.Сино бо хиёбони Борбад) то буриши кӯчаи Ханжин П.С.-и  шаҳри Душанбе аз 22 майи соли 2017 то 10 июли  соли 2017  бо ҷамъбасти он на дертар аз 15 июли соли 2017 эълон ва шартҳои  он тасдиқ гардид.

Довталабон  метавонанд ҳуҷҷатҳои худро барои иштирок дар озмун аз 10 майи соли 2017 то 10 июли соли 2017 ба Сарраёсати меъморӣ ва шаҳрсозии шаҳри Душанбе бо қайди «Барои озмун» ба суроғаи Ҷумҳурии Тоҷикистон, шаҳри Душанбе, кӯчаи Н.Қарабоев, 48, (почтаи электронӣ: DushanbeSRMhS@mail.ru) пешниҳод  намоянд.

Хотиррасон менамоем, ки барои иштирокчиён ва ғолибони озмун мукофот  муқаррар шудааст.

Ғолибони озмун минбаъд таҳиягари нақшаҳои иморатсозии мавзеъҳои мазкур мегарданд.

Мукофот барои шаҳрвандони ҷумҳурӣ бо пули сомонӣ ва  барои ғолиби хориҷӣ мутаносибан бо қурби муайянкардаи Бонки миллии Тоҷикистон бо  доллари ИМА пардохт карда мешавад.