Сокинони вилояти Хатлон 20-умин солгарди Рӯзи Ваҳдати миллиро дар ноҳияи Ёвон ҷашн мегиранд

ДУШАНБЕ, 16.05.2017 /АМИТ «Ховар»/. Сокинони вилояти Хатлон имсол 20-умин солгарди Рӯзи Ваҳдати миллиро дар ноҳияи Ёвон ҷашн мегиранд. Дар ин бора аз Мақомоти иҷроияи ҳокимияти давлатии вилояти Хатлон хабар доданд.
Тавре ки сардори идораи коммуналӣ, истеҳсолӣ ва истифодаи манзилии шаҳраки Ёвон Субҳон Ёров иттилоъ дод, бо мақсади дар сатҳи баланд таҷлил намудани 20-солагии Ваҳдати миллӣ дар маркази ноҳияи Ёвон 200 бех ниҳоли ороишӣ, дар гулгаштҳо 11 ҳазор бех гули садбаргу лола ва 25 ҳазор бех гулҳои мавсимӣ шинондаанд.
Инчунин зикр намуд, ки масъулини ноҳия баҳри сазовор пешвоз гирифтани ҷашни миллӣ корҳои созандагиву бунёдкорӣ, ободонию сабзазоркуниро вусъат бахшида истодаанд.
Дар асоси нақшаи корӣ, ба муносибати 20-умин солгарди Рӯзи Ваҳдати миллӣ дар муассисаҳои таҳсилоти миёнаи умумӣ, коллеҷҳо, литсейҳои касбии техникӣ, марказҳои фарҳангии ҷавонон ва чойхонаҳои ҷамъиятии ноҳияи Ёвон барномаҳои гуногуни оммавӣ, конфронсу суҳбатҳо, озмуну маҳфилҳои илмию фарҳангӣ доир мегарданд.