Фурӯши шир дар ҳудуди пойтахт минбаъд тариқи нақлиёт ба роҳ монда мешавад

ДУШАНБЕ, 21.06.2017 /АМИТ «Ховар»/.   Бо мақсади беҳтар намудани таъмини сокинони шаҳри Душанбе бо маҳсулоти ширӣ  ва бо дарназардошти риояи талаботу қоидаҳои санитарию байторӣ, оташнишонӣ ва экологӣ минбаъд дар  ҳудуди пойтахт фурӯши шир тариқи нақлиёти Ҷамъияти дорои масъулияти маҳдуди «Агросаноат»  ба роҳ монда мешавад.

Дар ин бора имрӯз Қарори Раиси шаҳри Душанбе Рустами Эмомалӣ ба тасвиб расид.

Аз  Раёсати иттилоот ва робитаҳои хориҷии дастгоҳи Раиси шаҳри Душанбе ба АМИТ «Ховар» хабар доданд, ки  тибқи қарори мазкур ҶДММ «Агросаноат»  вазифадор гардидааст, ки ҳар рӯз аз соати 05:00 то 09:00 ва аз соати 18:00 то 20:00 сокинони пойтахтро бо шир таъмин намуда, рӯйхати мавзеъҳои барои фурӯши шир дар ҳудуди шаҳри Душанбе интихобшударо   бо Раёсати рушди иқтисод ва савдои Мақомоти иҷроияи ҳокимияти давлатии шаҳри Душанбе мувофиқа намояд.