Ифтитоҳи бинои шуъбаи таваллудхона дар ҷамоати деҳоти Сари Хосори ноҳияи Балҷувон

ДУШАНБЕ, 27.07.2017 /АМИТ «Ховар»/. Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҳамчунин дар расми ифтитоҳи бинои шуъбаи таваллудхона дар назди беморхонаи минтақавии рақами 2-и ҷамоати деҳоти Сари Хосор иштирок намуданд.

Тавре иттилоъ дода шуд, корҳои сохтмонӣ дар иншооти мазкур моҳи марти соли 2016 оғоз гардидаанд ва дар ин муддат шуъбаи таваллудхона бо сифати баланд ва ҷавобгӯ ба талаботи замон бунёд карда шудааст.

Бино аз 9 утоқи ташхису табобат ва дигар иншооти ёрирасон иборат буда, дорои беҳтарин шароити хизматрасонии тиббӣ мебошад. Утоқҳо бо таҷҳизоти муосир, аз ҷумла дастгоҳи сабти барқии дил, ултрасадо ва дигар лавозимоти тиббӣ барои бемориҳои занона муҷаҳҳаз карда шудаанд.

Барои харидории дастгоҳу таҷҳизоти тиббӣ дар таваллудхонаи Сари Хосор бештар аз 300 ҳазор ва дар корҳои сохтмонии иншоот 1 млн. 200 ҳазор сомонӣ масраф шудааст.

Пешвои миллат муҳтарам Эмомалӣ Раҳмон зимни шиносоӣ аз шароити хизматрасонии таваллудхона ба сифати корҳои сохтмонӣ баҳои баланд дода, табибонро ба хизмати софдилона ва аз таҳти дил даъват намуданд.

Тавре маълум гардид, иншооти мазкур бо маблағгузории соҳибкори ватандӯст Рустам Саидов бунёд гардидааст. Корҳои бунёдгарӣ аз тарафи ширкати «Евро-стандарт» ба анҷом расонида шудаанд.

Дар таваллудхонаи навбунёди ҷамоати деҳоти Сари Хосор 15 нафар табибони дорои тахассуси гуногун бо ҷои кори доимӣ ва маоши хуб таъмин шудаанд.

Президенти мамлакат муҳтарам Эмомалӣ Раҳмон дар баробари ифтитоҳи чунин таваллудхонаи замонавӣ дар маркази ҷамоати деҳоти Сари Хосор ба кормандони он як адад автомобили ёрии таъҷилӣ туҳфа карданд, ки аз тарафи мардуми саодатманди ҷамоат бо изҳори миннатдорӣ, самимияти бепоён ва хушҳолии беандоза пазируфта шуд.