Ноҳияи Рӯдакӣ: «Сим-сим» ободкорӣ мекунад

РӮДАКӢ, 28.07.2017. /АМИТ «Ховар»/. Дирӯз  роҳи мошингарди  деҳаи Навбунёди  ҷамоати деҳоти Чоргултеппаи ноҳияи Рӯдакӣ бо иштироки меҳмонон ва фаъолони деҳа мавриди баҳрабардорӣ  қарор гирифт. Роҳи мазкур зиёда аз якуним километр дарозӣ дошта, сокинони деҳаи Навбунёд солҳои тӯлонӣ бо он ба мушкилӣ  рафтуомад мекарданд.  Дар асоси дастуру супоришҳои Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон     кормандони ҶДММ «Сим-сим»-и ноҳия бо маблағи зиёда аз як миллион сомонӣ теппаҳоро ҳамвор намуда, масоҳати роҳро ба 7 метр расониданд ва онро сангфаршу асфалтпӯш намуданд. Инчунин дар  як тарафи роҳ ҷӯйборҳои бетонӣ ва лӯлаҳои  обпарто насб кардаанд, ки дар оянда роҳи мазкур фарсуда нагардад.

Масъулини ҶДММ «Сим-сим» ният доранд, ки бо назардошти имкониятҳои мавҷуда  минбаъд низ чунин корҳои ободониро давом диҳанд.