Шавкат Бобозода: «Тоҷикистон моҳи сентябр дастовардҳои саноатиашро дар Тошканд муаррифӣ менамояд»

           ДУШАНБЕ, 28.07.2017/АМИТ «Ховар»/. Ҳамкории иқтисодию тиҷоратии  ду кишвари  дӯсту бародар  ва  ҳамсоя-  Тоҷикистон ва Ӯзбекистон беш аз пеш густариш меёбад. Далели ин гуфта моҳи сентябри  соли равон  ташкили намоишгоҳи молҳои саноатии  Тоҷикистон дар Ӯзбекистон мебошад.

Шавкат Бобозода,  Вазири саноат ва технологияҳои нави Ҷумҳурии Тоҷикистон зимни нишасти матбуотӣ дар Душанбе гуфт, ки дар намоишгоҳи молҳои саноатии Тоҷикистон, ки моҳи сентябр дар шаҳри  Тошканд созмон дода мешавад, 64 корхонаю ширкатҳои саноатии Ҷумҳурии Тоҷикистон молу маҳсулоти худро ба намоиш мегузоранд. Вазир афзуд, ки дар кори иштирок дар намоишгоҳҳо корхонаю ширкатҳои саноатии Тоҷикистон таҷрибаи бой доранд ва умед аст, ки истеҳсолкунандагони мо дар ин намоишгоҳ фаъолона ширкат намуда, молу маҳсулоти ватаниро муаррифӣ намоянд. Интизор меравад, ки дар намоишгоҳ  Тоҷикистон молу маҳсулоти саноати  мошинсозӣ, маъданҳои кӯҳӣ,  саноати сабук, маҳсулоти аз алюминий истеҳсолгардида, фармасевтӣ ва хӯроквориро  ба намоиш гузорад.

Дар доираи намоишгоҳ  ҳамзамон  баргузории ҳамоиши доираҳои соҳибкорию тиҷоратии Тоҷикистону Ӯзбекистон дар назар аст.