Бонки миллӣ дар кӯчаи Ҳофизи Шерозӣ майдончаи варзишию истироҳатӣ бунёд кард

ДУШАНБЕ, 14.08.2017 /АМИТ «Ховар»/.  Бо ибтикори Бонки миллии Тоҷикистон    дар кӯчаи Ҳофизи Шерозии ноҳияи Исмоили Сомонии шаҳри Душанбе барои наврасон майдончаи варзишию истироҳатӣ ба истифода дода шуд. Дар ин бора ба мухбири АМИТ «Ховар» аз Бонки миллии Тоҷикистон хабар доданд.

Лоиҳаи майдончаи мазкур аз ҷониби ширкати ПИТЛ «Душанбешаҳрсоз» тарҳрезӣ гардида, корҳои сохтмонӣ аз тарафи Ҷамъияти дорои масъулияти маҳдуди «Сохтмони шаҳр» дар муддати се моҳ ба маблағи 520 ҳазор сомонӣ ба анҷом расонида шуданд.

Дар маросими ифтитоҳи майдонча муовини раиси шаҳри Душанбе Мавсума Муинӣ, муовини раиси Бонки миллии Тоҷикистон Сироҷиддин Икромӣ, раиси ноҳияи Исмоили Сомонии пойтахт Самӣ Шариф ва сокинон ширкат доштанд.

Зикр карда шуд, ки   ифтитоҳи иншооти мазкур дастгирӣ аз сиёсати бунёдкоронаи Ҳукумати ҷумҳурӣ мебошад.