Дар Бадахшон дар давоми се рӯз 397 ҳолати вайронкунии қоидаҳои ҳаракати роҳ ошкор гардид

ХОРУҒ, 20.09.2017 /АМИТ «Ховар»/.  Нозирони шуъбаи Бозрасии давлатии автомобилии Раёсати Вазорати корҳои дохилии Ҷумҳурии Тоҷикистон дар ВМКБ бо мақсади ба танзим даровардани ҳаракати воситаҳои нақлиёт, таҳияи дурусти санаду ҳуҷҷатҳо ва пешгирӣ аз ҳар гуна садамаҳо санҷиши серӯза гузарониданд.

Тавре нозири калони шуъбаи мазкур, майори милитсия Хосият Гулзорхонова ба хабарнигори АМИТ «Ховар» гуфт,  «дар давоми се рӯз 397 ҳолати вайронкунии  қоидаи ҳаракати роҳ ошкор карда шуд. Як нафар дар ҳолати мастӣ, чор  нафар бидуни ҳуҷҷати ронандагию шишаҳои сиёҳи ғайриқонунӣ ва 7 мошини бе шаҳодатномаи санҷиши техникӣ боздошт ва ҷарима баста шуданд. Дар ҷараёни санҷиш 9 ронанда ба шуъбаи Бозрасии давлатии автомобилии шаҳри Хоруғ муроҷиат карда, баъди пардохти 22 ҳазору 500 сомонӣ ба онҳо иҷозатномаи истифодаи шишаҳои сиёҳ дода шуд.  Бештар  аз 5 мошин бо рақамҳои худсохт ва ҳуруфи арабӣ, рақамҳои номаълуми пластикӣ, аз ҷумла 55 55 РТ 04, 91 91 АА 04, 98 98 АО 01, Т АВ 826 77 RUS, ТҶ 40 00 04 ва ба ин монанд боздошт ва ба ҷаримагоҳи Раёсати Вазорати корҳои дохилии вилоят интиқол дода шуданд».

Вобаста ба ин як гурӯҳи нозирон дар маҳаллаҳои шаҳри Хоруғ бо ронандагони ҷавон суҳбат гузаронида, онҳоро даъват намуданд, ки қоидаҳои ҳаракати роҳро риоя  кунанд. Зеро як ҳаракати нодуруст ва  хилофи қоида бар зарари худи ронанда ва чандин мусофиру пиёдагард анҷом меёбад.