Дар Душанбе барои интихоби пудратчии иҷрои корҳои навсозии истгоҳҳо тендер доир мешавад

ДУШАНБЕ, 16.09.2017 /АМИТ «Ховар»/. Бо мақсади интихоби пудратчии иҷрои корҳои навсозии истгоҳҳои нақлиёти мусофирбари мавҷуда бо ороиши замонавӣ дар хиёбони Рӯдакӣ, кӯчаҳои Айнӣ ва Аҳмади Дониш аз ҷониби Мақомоти иҷроияи ҳокимияти давлатии шаҳри Душанбе тендер баргузор карда мешавад.

Дар ин бора Қарори Раиси шаҳри Душанбе Рустами Эмомалӣ дар бораи баргузор намудани тендер ба тасвиб расид.

Тавре ба АМИТ «Ховар» аз Раёсати иттилоот ва робитаҳои хориҷии дастгоҳи Раиси шаҳри Душанбе хабар доданд, тибқи қарори мазкур Комиссияи тендерии аз тарафи Воҳиди хариди мақомоти иҷроияи ҳокимияти давлатии шаҳри Душанбе пешниҳодшуда дар ҳамкорӣ бо Муассисаи давлатии «Раёсати сохтмони асосӣ»-и мақомоти иҷроияи ҳокимияти давлатии шаҳри Душанбе барои интихоби пудратчии иҷрои корҳои навсозии истгоҳҳои нақлиёти мусофирбарии мавҷуда бо ороиши замонавӣ дар хиёбони Рӯдакӣ, кӯчаҳои Айнӣ ва Аҳмади Дониш мутобиқи санадҳои меъёрии ҳуқуқӣ бояд ҳуҷҷатҳои заруриро барои гузаронидани тендер омода намуда, эълон, баргузорӣ ва ҷамъбасти тендерро бо иштироки номаҳдуди довталабон таъмин намояд.